आज वि.सं. २०७६ साल भदौ २२ गते आइतबार, तदनुसार ई. सं. २०१९ सेप्टेम्बर ०८ तारिख

मेष (चु, चे, चो, ला, लि, लु, ले, लो, अ) आज व्यापारबाट मनग्ये फाइदा हुने देखिन्छ । सेवामूलक कामबाट प्रतिष्ठा मिल्ने समय छ । तर शनि र चन्द्रमाको युतिसम्बन्ध भएकाले काम रोकिनुका साथै मानसम्मानमा आघात पुग्न सक्छ । फाइदा कममात्र हुनेछ । बोलीको गलत अर्थ लाग्नाले सहयोगीहरू टाढिन सक्छन् । अरूका काममा श्रम तथा बुद्धि खर्चनु पर्ला । आफ्ना काम स्थगित हुनाले मन खिन्न हुनेछ । कमजोरीले चिन्ता बढाउन सक्छ । बाध्यतामा अलमलिनुपर्दा चिताएको काम रोकिन सक्छ ।

बृष (इ, उ, ए, ओ, बा, बि, बु, बे, बो) मनमा चिन्ता, शङ्का र डरले जरो गाड्ने समय हो । यद्यपि आज गरिएका मिहिनेत र परिश्रम खेर जाँदैन, लगानी, दौडधुप, श्रम र प्रयत्नको उचित मूल्य प्राप्त हुनेछ । अनुभवी र जान्नेबुझ्नेको रायसल्लाह लिई नयाँ काममा हात हाल्दा राम्रो हुन्छ । गरी आएका व्यापारव्यवसाय र कामधन्दाका क्षेत्रबाट पनि फाइदा नै हुनेछ । नचिताएको मान्छेको सहयोग पाइने छ । पशुधन र जमिनबाट सामान्य लाभ उठाउन सकिने छ । परिवारमा आमाको सहयोगबाट सोचेको काम सम्पादन हुनसक्छ । तर हरेक क्रियाकलापमा संयमता र सचेतताको खाँचो रहने छ भन्ने बुझ्नुपर्छ ।

मिथुन (का, कि, कु, घ, ङ, छ, के, को, ह) मन रोमान्टिक र भावुक भए पनि मनका इच्छा र आकाङ्क्षा पूर्ण हुने लक्षण देखिंदैन । दिन मनोरञ्जनपूर्ण नै रहने छ, तर पनि मनमा निराशा र वैराग्यका भावना मँडारिन सक्छन् । पठनपाठनमा रुचि हुँदैन । नयाँ ज्ञान सिक्ने मौका त छ, तर मिहिनेत र परिश्रममा कमी आउनाले पूर्ण हुँदैन । दाम्पत्य जीवन वा प्रेमसम्बन्धमा चिसोपन देखिने छ, फकाउने फुस्ल्याउने परिस्थिति बन्नसक्छ । यथासम्भव समय र परिस्थितिलाई पर्गेलेर काम गर्न सके प्रेम र मित्रताको बन्धन कसिने बेला छ । साझेदारी र श्रममूलक कामका माध्यमबाट लाभ लिन सक्नुहुनेछ ।

कर्कट (हि, हु, हे, हो, डा, डि, डु, डे, डो) प्रयत्न गर्दा सजिलै फाइदा लिन सकिने छ । शत्रु र रोगबाट छुटकारा मिल्ने समय छ । तर्क, बहस, वादविवाद र मुद्दामामिला कार्यक्षेत्र भएका व्यक्ति राम्रो लाभ पाउने र प्रतिष्ठा मिल्ने समय हो । व्यापार तथा उद्योगतर्फ सामान्य फाइदाको योग छ । अधिकारका लागि केही संघर्ष पनि हुनसक्छ । सानो प्रयत्नले ठूलो काम सम्पादन हुनसक्छ । एउटै कामबाट दोहोरो लाभ मिल्नेछ । काम बन्नाले निकै उत्साहित भइनेछ । गरेका कामबाट धेरैलाई फाइदा पुग्न सक्छ । विशेष सभासमारोहमा सहभागी बन्ने मौका छ ।

सिंह (मा, मि, मु, मे, मो, टा, टि, टु, टे) उद्योग तथा व्यापारमा सामान्यतया फाइदा नै हुनेछ । आफन्त र सँगीसाथीसँगको आत्मीयतामा कमी आउने छैन । प्रेमी तथा प्रेमिकाका बीचमा नजिकको सम्बन्ध कायम हुनेछ । आर्जित वा सञ्चित धन भावनात्मक काम वा मनोरञ्जनात्मक क्रियाकलापमा खर्च गर्ने परिस्थिति आउने छ । आज कुनै पनि काममा स्वनिर्णय र नेतृत्व नगरेको जाति हुन्छ । किनभने आफ्नै त्रुटि र कमजोरीका कारण जस नपाउन सक्नुहुन्छ । आशा गरेअनुरूप सहयोगीहरूले साथ पाइने नै समय हो ।

कन्या (टो, प, पि, पु, ष, ण, ठ, पे, पो) खराब समय छ । आफैंले गरेका निर्णय कार्यान्वयन गर्न धौधौ पर्नेछ । आफन्तका बीचमा खटपट, चिन्ता र शङ्का उब्जने छ । परिवारभित्र मनोमालिन्य बढ्ने सङ्केत छ । मान्यजनको सुझावलाई नमान्नाले काम बिग्रन सक्छ । आमा वा घरकी बृद्ध स्त्रीको स्वास्थ्यमा समस्या देखिन सक्छ । समयमा होस नपुग्नाले बन्नै लागेको काम पनि बिग्रन सक्छ । घरखर्चको मात्रा बढ्नेछ । मौकालाई पहिचान गर्न नसक्नाले पछुतो मान्ने परिस्थिति बन्नेछ ।

तुला (र, रि, रु, रे, रो, ता, ति, तु, ते) आज हिम्मत र साहस जुटाएर काम गर्ने समय छ । लगनशीलता र परिश्रमको अभावमा व्यापारमा मन्दी छाउने छ । नयाँ काम सुरु गर्न निकै खट्नु पर्नेछ । कुनै आवश्यक काम पूर्ण गर्न खर्चको मात्रा बढाउनु पर्ने परिस्थिति देखा पर्नसक्छ । सँगीसाथको साथ पाइने नै समय छ, तर जति मिहिनेत भएको छ, प्रतिफल कममात्र हातपर्ने दिन हो । तापनि उठ्नुपर्ने रकम हातलागी हुने समय हो । गरिआएको काममा भन्दा अस्थायी पेसाबाट फाइदा हुने समय छ ।

बृश्चिक (तो, ना, नि, नु, ने, नो, या, यि, यु) आज मिश्रित प्रभाव प्राप्त हुने समय छ । अरूको विषयमा चासो राख्दा वादविवाद हुनसक्छ । धैर्यसाथ गरिएको कामबाट फाइदा हुनेछ । तर रिसराग र बोलीवचनमा संयमता देखाउन सकेमा नचिताएको काम बन्न पनि सक्छ । अरूलाई प्रभावित पारेर काम बनाउन सकिने समय छ । बोलीमा मिठास र चाकरीको व्यवहार देखाउनु पर्छ । विगतको गल्ती र कमजोरीको कुरो उठ्न सक्छ । पठन–पाठनमा ध्यान दिने फुर्सद हुँदैन ।

धनु (ये, यो, भ, भि, भु, ध, फा, ढ, भे) मनमा उत्साह र उमङ्गको कमी देखिने छ । तर आज आफ्नै राशिमा चन्द्रमाको प्रवेश भएको छ, आत्मबल बढाएर काम गरेमा असफल भइँदैन । श्रमपूर्वक समर्पित भएमा कामको मूल्य पाइने सम्भावना छ । भोजभतेरमा सहभागी हुन पाइने छ । परिवारजनसँगको आत्मीयतामा कमी आउँदैन, काम गर्दा गोपनीयतामा जोड दिनु पर्नेछ । आक्षेप लगाउनेहरू सक्रिय हुनेछन् भने पहिलेका सहयोगीहरू पछि हट्न सक्छन् । धैर्य र संयमताको पालना गर्दै अनुशासित र कर्तव्यपरायण बन्ने प्रयत्न गर्नुहोला ।

मकर (भो, ज, जि, खि, खु, खे, खो, गा, गि) आफ्नो बुद्धि र विवेकको प्रयोग गर्न सके आजको दिनलाई सकारात्मक बनाउने समय छ । प्रयत्न गर्दा वैदेशिक प्रयोजनको काम वा टाढाको यात्रा गर्ने प्रक्रिया अघि बढ्न सक्छ । त्यस्तै यात्राका क्रममा अपनाएको सचेतताले ठूलो नोक्सानी हुनबाट जोगिने छ । दूरदराजबाट शुभ समाचार सुन्नपाइने छ वा कुनै उपहार प्राप्त हुने सम्भावना पनि देखिन्छ । खर्च लागे पनि दिगो फाइदा हुने काममा लगानी गर्ने अवसर जुट्न सक्छ । चुनौतीहरू पन्छाउँदै रोकिएका काम बनाउन सकिने छ । धैर्यले काम लिने समय छ ।

कुम्भ (गु, गे, गो, सा, सि, सु, से, सो, द) सोचेभन्दा राम्रो फाइदा हुने समय आएको छ । लामो समयदेखि रोकिएको काम बन्नुका साथै आम्दानीको स्रोत समेत बढ्नेछ । व्यावसायिक काममा राम्रै फड्को मार्न सकिने छ । पठनपाठनमा प्रगति हुनेछ । व्यापार–व्यवसायमा लाभ हुनेछ । व्यवसाय विस्तारका लागि यात्रा पनि हुनसक्छ । साझेदारी र सट्टापट्टामा विशेष लाभ मिल्नेछ । नयाँ जिम्मेवारी पाइएला । श्रमको उचित मूल्याङ्कन हुनेछ । सोचेभन्दा राम्रै लाभ हुनेछ । आतिथ्यपूर्ण सम्मान पाइएला ।

मीन (दि, दु, थ, झ, ञ, दे, दो, च, चि) आज सरकारी काममा झमेला आउने दिन हो, त्यस्तै वादविवाद र मुद्दामामिलाबाट टाढा बस्ने समय छ, नत्र कर्मचारी वा शासक वर्गबाट पीडित हुनुपर्ने वा धोका हुनसक्ने समय छ, सचेत हुनुपर्छ । आर्थिक लाभ नहुने कामको जिम्मेवारी वहन गर्नुपर्ला । पढाइलेखाइमा समय दिन सकिंदैन । लक्ष्य र योजना गोप्य राखेर अघि बढ्दा फाइदा हुनेछ । आत्मबल र हिम्मतको प्रयोग गर्ने समय हो । गरेको कामले धेरैको मन जित्न सकिने छ । ठूलाबडा र विशिष्ट व्यक्तित्वहरूसँग मित्रता बढ्नेछ ।

प्रतिकृया दिनुहोस

सम्बन्धित समाचार